المشاركات
غزوة الفسيخ وانتصار شم النسيم
الفسيخة التى هزمت المشايخ ..!!
مرة أخرى ينتصر الجمال على محاولات القبح ..
هذا العام كان شم النسيم العيد المصرى ليس فى مواجهة الفتاوى والحملات الموسعة لتحريمه
ولكن كان إصرار غريب من وزارة التعليم ان تبدأ امتحانات نهاية العام فى اليوم التالى لشم النسيم ورغم كل ذلك .. انتصر الفسيخ
وقال الشعب للمشايخ بيننا وبينكم الشوارع والحدايق والبحور..
وقال المشايخ للشعب بيننا وبينكم الفتاوى والويل والثبور..
وكان المشايخ يباهون الشعب انهم يقولوا الامر فينفذ دون نقاش وكما قال الشيخ محمد حسين يعقوب اتبع شيخك ولو على خلاف هواك .. لكن لما يكون الهوا هوا النيل . والهوا جميل يبقى فيه كلام تانى .. فرغم الحرب الشعواء على عيد شم نسيم لا لشىء الا لانه عيد فرعونى ويربط البعض بينه وبين اعياد النصارى .. ورغم ان الغزوة كانت مكتملة الاركان الا ان الشعب قال كلمته وخرج يحتفل بشم النسيم رغما عن انوف المشايخ .. كانت حربا منظمة ومرتبة واستخدمت فيها كل الوسائل .. وآخرها عندما خرج السلفيون فى الاسكندرية بمنشورهم ان يوم شم النسيم يوم شؤم وفجور .. الحقيقة لا اعرف معنى للفجور هنا .. فنحن نأكل السمك ولا نتحرش به .. ونلون البيض ولا نرقد عليه .. فقط نستمتع بنعم الله علينا .. وهل المتعة الحلال فى بلدنا حرام ؟؟ .. وهل مصر مثلها كمثل بلاد الصحراء حيث لا ماء ولا هواء مجرد رمال صفراء وخواء.. ولماذا نصر على نقل الصحراء الى ضفاف النيل ؟ .. قال الشيخ شم النسيم يوم فجور .. الا تستحى يا رجل ؟ .. فجور مرة واحدة .. يعنى كل الناس اللى خرجت دى فى شوراع مصر كانت خارجة للفجور ..؟ عيب عليك ..ولكنها نوع من الحرب النفسية ... وهذا نموذج واضح لارهاب الناس باسم الدين حتى تصير حياتهم مجرد عروسة ماريونيت يحركوها كيفما أرداوا .. شمال شمال .. يمين يبقى يمين .. ثم يتنحنح الشيخ ويقول الشعب قال كلمته .. وطبعا كلمته دى يعنى كلمة الشيخ مش كلمة الشعب لان مفروض الشعب ما يكونش ليه كلمة اساسا ..
كانت غزوة البيض والبصل والفسيخ فى شم النسيم النهاردة فى صالح الشعب المصرى وفى صف الوسطية والبساطة والبهجة والسعادة وكانت خصما من رصيد البؤس وفرض السواد على مظاهر الحياة فى مصر.. مين اللى يقدر يحرم الفرحة ..السنة دى برضه خرج علينا شيخ جليل يحرم شم النسيم وفى السكة حرم كمان اللى يبيع البيض والملانة والبصل والفسيخ للناس .. يعنى موت وخراب ديار .. يعنى الست اللى طالعة بخمسين لمونة ..تعصرهم على العيش الحاف وتاكلهم عشان فضيلة الشيخ ..وبياع البيض يشترى فراخ ترقد ع البيض يفقس كتاكيت .. واللى بيبيع فسيخ يتفسخ جنبه .. دخل المشايخ حربا خاسرة مع البيض و الرنجة و الفرحة والتاريخ والتراث والبهجة والنيل .. كان للفراعنة اكثر من ستين عيد يفرحون بها .. وياتى اليوم من يحرم ما بقى من الفرحة .. التى قلت مع الزمن وقلة البركة
لقد احتفلت مصر كلها بشم النسيم .. مسلمون واقباط .. فقراء واغنياء .. كبار وصغار ..ع الكورنيش وفى مارينا .. فى الجنينة وع الشط .. فى الشارع وفى الميدان .. على صوت الجرس والادان .. وماحدش قال اوعى يا عم دا عيد النصارى .. ولا عيد توت عنخ امون .. دا عيد مصر .. مصر اللى لسه الاحلام فيها ممكنة .. لقد هزمت الفسيخة الارهاب الفكرى ورعاته الرسميين من مشايخ الفتنة والفرقة ..
0 التعليقات:
إرسال تعليق